Gaur-gaurkoz ez dago arrazoirik pentsatzeko Israel eta AEBak ez direla egun batzuk barru Iran berriro bonbardatzen hasiko. Batetik, Ormuzko itsasarte estrategikoak 24 ordu ere ez dituelako egin irekita; atzo arratsaldean ireki ondoren, Teheranek gaur goizean itxi du berriro, argudiatuta AEBek eusten diotela Irango portuei ezarritako blokeoari. Bestetik, Teheranek nabarmendu duelako ez duela AEBekin hitz egiten jarraitzeko asmorik, iruditzen baitzaio haien eskaerak «gehiegizkoak» direla. Eta, azkenik, Donald Trump Etxe Zuriko maizterrak gaur goizaldean esan duelako «beharbada berriro bonbak jaurtitzen hasi beharko» dutela, otsailaren 28aren eta apirilaren 7aren artean egin bezala. Duela hamar egun sartu zen indarrean aldeek adostutako tregoa, eta asteazken goizaldean bukatuko da.
Ormuzko pasabidearen gaineko kontrola gerrako arma gisa baliatzen ari da Iran, aintzat hartuta handik igarotzen dela munduan kontsumitzen den petrolioaren %20 inguru, eta hura itxita edukitzeak gorakada bat eragiten duela, oro har, erregaien prezioetan, eta energiaren merkatua aztoratzen duela. Eta atzo gauetik jada suma zitekeen Teheranek berriro itxiko zuela, AEBek eutsiz gero Iran irteera edo helmuga duten ontziei bidea ixteko erabakiari. Izan ere, Tasnim eta Fars berri agentziek Irango Guardia Iraultzailearen ohartarazpen baten berri eman zuten. Gaur goizaldean ere abisatu du Mohamad Baqer Qalibaf parlamentuko presidenteak, X sare sozialean.
Eta ordu batzuk geroago itxi du Iranek. Armadaren bozeramaile Ebrahim Zolfagarik adierazi du ontzi batzuei itsasartetik pasatzen utzi dietela, negoziazioen barruan «fede oneko keinu gisa»; baina berriro blokeatu dute, AEBek Irango ontziei bidea ixteko erabakia mantentzen baitute. Bide batez, Irango Segurtasun Nazionaleko Kontseilu Gorenak azpimarratu du Ormuzen gaineko kontrola hartuko duela, «gerra guztiz bukatu arte». Hori argitaratu dute hango hedabideek.
Atzo, Iranek itsasartea irekitzen zuela iragarri eta ia berehala, Trumpek eskerrak eman zizkion Teherani; hori bai, minutu batzuk geroago jakinarazi zuen AEBen blokeoak bere horretan jarraituko zuela. Gaur, Etxe Zurian kazetariekin hizketan, eskatu die Irango aiatolei «xantaiarik» ez egiteko Ormuzekin.
6Zenbat aireportu ireki dituzten Iranen. Irango hedabideek iturri ofizialak aipatuz gaur kaleratu dutenez, herrialdeko sei aireportu ireki dituzte azken orduetan; bi, Teheran hiriburuan. Kontuan hartu behar da aire eremua itxita egon dela otsailaren 28tik, Israelek eta AEBek Iranen kontrako erasoaldia hasi zutenetik.
Zenbait orduz egon da zabalik Ormuz, eta tarte horretan petrolio-gas likidotua eta petrolioa zeramaten hamar bat ontzik zeharkatu dute. Hori argitaratu dute albiste agentzia batzuek, itsas trafikoaren jarraipena egiten duten webguneak iturri gisa aipatuz. Eta behin atzera itxita, petrolioa garraiatzen ari ziren Indiako bandera zuten bi ontziri eraso egin diete pasabidean. Hori salatu du Indiako Atzerri Ministerioak ohar batean, eta jakinarazi Teheranek New Delhin duen enbaxadorea bilera batera deitu dutela.
KASKO URDIN BAT HIL DUTE LIBANON
Nazio Batuen Libanorako Indar Behin-behinekoei (Unifil) tiro egin diete gaur Libano hegoaldean, eta eraso horretan kasko urdin bat hil dute —hiru dira zaurituak—. NBEren misio horrek ohar batean zehaztu duenez,
errepide batetik lehergailuak kentzeko lanean ari zirela egin diete tiro; iturri horren arabera,
«estatu batekoak ez diren agenteak» izan dira erasotzaileak. Hildako kasko urdina Frantziakoa da, eta, hango presidente Emmanuel Macronek sare sozialetan azpimarratu duenez, «itxura guztien arabera» Hezbollahk eraso egin die misio
ko militarrei. Libanoko milizia xiita horrek, baina, ukatu egin du, eta bere menpeko telebista kate batean «arduraz» jokatzeko eskatu du.
Libanon atzo sartu zen indarrean su etena, baina Israelgo armadak gaur jakinarazi du azken orduetan hainbat aire eraso egin dituela herrialdearen hegoaldean. Ohar baten bidez jakinarazi duenez, eraso egin dute Hezbollahko kideak bere posizioetara hurbiltzen ari zirelako, eta horiek «mehatxu bat» zirelako. Bien bitartean, milaka desplazatuk herrialdearen hegoaldera itzultzen segitu dute gaur ere. Hamar egunerako menia adostu zuten Israelek eta Libanok.
Blokeorik gabeko egoera batean, 135-140 ontzik zeharkatzen zuten Ormuz egunero. Iranek otsailaren 28an itxi zuen. Apirilaren 8an AEBekin adostutakoak jasotzen zuen pasabidea irekitzea, baina Iranek itxita mantendu du, Libanon meniarik ez zegoelako. Han ere ezarri zuten herenegun, eta Iranek ireki egin zuen atzo; 24 orduz ere ez, ordea.
Iran, erantzuteko prest
Trumpek duela pare bat egun esan zuen aldeak asteburuan Islamabaden biltzekoak zirela negoziatzen jarraitzeko. Baina ez dute bilerarik egin Pakistango hiriburuan. Iranek nabarmendu du, gainera, ez duela parte hartuko «porrotera kondenatutako» elkarrizketa batzuetan. Hori adierazi die gaur kazetariei Saeed Khatibzadeh Atzerri ministrordeak Turkian, hainbat estatutako diplomaziaburuak bildu dituen foroan.
Joan den larunbatean bildu ziren Iran eta AEBak aurrez aurre Islamabaden, Pakistanen bitartekaritzarekin. Akordiorik gabe amaitu zen bilera. Eta menia asteazken goizaldean bukatuko da. Trump bonbak jaurtitzeko prest dago, eta, kasu horretan, Iranek erantzun egingo luke, Mojtaba Khameneik gaur Telegramen esan duenez.
